Hohò Trieste

Il 20 settembre 1908 nasceva Carolus L. Cergoly
Hohò Trieste
Città del mondo
Balorda e ciacolona
Senza creste
Zufoli flà flà
O Trieste
Vestida a la birbona
Maia de mariner
Cotole a pieghe
Gambe cavalle
In scarpe carsoline

Hohò Trieste
Lunatica nervosa
Imborezzo de feste
Groppo de sentimenti
Del nord ocio celeste
Del sud pelle de sol
E satanassi in corpo
Asmodeo con Tobia
Lotta che mai finissi

Hohò Trieste
A la Locanda Granda
Carlo colonna
Sesto d’Asburgo
Canto de Saba
Colori de Veruda
Prosa de Svevo
Analisi de Weiss
Questio Vivante
Palazzo de Carciotti
E de Plenario
Barche in Canal
E mussoli ai cantoni
Da Servola a Roian
Da Opcina a Dolina
Strenzendose la man
Monte e marina

Hohò Trieste
Contime le fiabe
De Smito e de Popò
De sior Intento
Strighezzi de la nonna
In dondolo sentada
Ghirigori parole
Tiritere colori
Coriandoli allegria
Nonna
Son sempre mi
El putel vestì
De mariner
Su la berretta
El nastro “Tegetthoff”
E la franzetta
Bionda dei cavei
Ben pettinada

Hohò Trieste
Del sì del da del ja
Tre spade de tormenti
Tre strade tute incontri
O Trieste
Piazze contrade androne
Piere del Carso
Acqua de marina
Tutte t’ingrazia
Mettile in vetrina
E mi insempià
Col naso contro vetro
Vardo e me godo
Le bellezze tue

Hohò Trieste
Filtro ch’inverdissi
Sui pastini riposa
El mio cantar
Coi ghiribissi
Dei refoli de Bora
Dei rizzi d’onda
Dei nuvoli a sfilazzi
O Trieste
Caro viso
Adorabile volto
Inferno e paradiso
Mio albero cressù
Dentro de mi
Con la radise in cuor
Col fior in bocca

Senti Trieste
El mio hohò
Forte innervà
Come l’onda
Contro la scogliera
Piantada fonda
Tra Barcola e Duin
la “Lepa Vida”

Prinz Thurn und Taxis
Trieste colibrì
O superstar
Mondo Trieste
Con quel tuo far
Sportivo e tirabasi
Eccote sul piedistal
In passerella

Battè martei
Sora scarpei
Cave de Nabresina
Alla mia bella
Aliga e tiglio
Modelleghe le man
Che sa far tuto
Prore vanghe
Fòndaci negozi
E ste poesie
De mi
Sconte in Certosa
Amici
Calice in alto
Sangue de Domovoi
Ecco el Terran

In gran pavese
El Lloyd
Vesti vapori
Salve barone Bruck
Bevo al tuo sogno
Settanta milioni
De nuvoli cavalco
Hihì hihì cavallo
Trotta ginetto
La mamma vien dal ballo
Hohò Trieste
“Es klingt und singt das blaue Meer”
O Trieste
Baso de Ninfa
Come cantava Max
Fiore d’Asburgo

Commenti